سڵاو،
له‌م بابه‌ته‌دا چۆنیه‌تی باشتر كردنی ماڵپه‌ڕه‌كه‌ت شی ده‌كه‌مه‌وه‌ به‌ هاوكاری و به‌كاربردنی ماڵپه‌ڕێكی دیكه‌ به‌ ناوی Website Grader. له‌ ماڵپه‌ڕی ناوبراودا ده‌توانی به‌سته‌ری ماڵپه‌ڕه‌كه‌ت بنووسیت و تاقیكردنه‌وه‌یه‌كی له‌سه‌ر ئه‌نجام بده‌یت كه‌ چه‌ند لایه‌نێكی جیاواز له‌ خۆی ده‌گرێت به‌ تایبه‌ت SEO واته‌ Search Engine Optimization.
بابه‌ته‌كه‌ له‌ دوو به‌شدا كۆ ده‌كه‌مه‌وه‌ و ئه‌مه‌ یه‌كه‌م به‌شی ده‌بێت.

Website Grader چیه‌ و چۆن كار ده‌كات؟ سوودی بۆ من وه‌ك خاوه‌ن ماڵپه‌ڕ چ ده‌بێت؟
Website Grader ماڵپه‌ڕێكه‌ كه‌ لێكۆڵینه‌وه‌یه‌ك له‌سه‌ر ماڵپه‌ڕه‌كه‌ت جێبه‌جێ ده‌كات به‌ شێوه‌یه‌كی ڕاسته‌وخۆ و له‌ ماوه‌ی خووله‌كێك دا ئه‌نجامی لێكۆڵینه‌وه‌ ڕوون ده‌بێته‌وه‌. كاتێك به‌سته‌ری ماڵپه‌ڕی خۆت ده‌نووسیت Website Grader هه‌ڵده‌ستێ به‌ به‌راوردكردنی ماڵپه‌ڕه‌كه‌ت و تایبه‌تمه‌ندیه‌كانی له‌گه‌ڵ ئه‌و یاسا و مه‌رجانه‌ی كه‌ پێش وه‌خت له‌ ماڵپه‌ڕه‌كه‌دا دانراون. بۆ نموونه‌ له‌ Website Grader مه‌رجێكی تایبه‌ت به‌ وێنه‌ هه‌یه‌ كه‌ به‌م شێوه‌یه‌ نووسراوه‌،
ئه‌گه‌ر وێنه‌یه‌ك له‌ نێو ماڵپه‌ڕدا نووسراوه‌ی Alt یان Alternative Text ی نه‌بێت ئه‌وا ئه‌و ماڵپه‌ڕه‌كه‌ كێشه‌ی هه‌یه‌ و به‌ڕه‌نگی سوور ئه‌و كێشه‌یه‌ ده‌رده‌خات بۆ خاوه‌ن ماڵپه‌ڕ، ئه‌گه‌ر وێنه‌كان هه‌موویان Alt Text ــیان هه‌بوو، ئه‌نجامه‌كه‌ی سه‌وز و سه‌ركه‌توو ده‌بێت. (ئه‌مه‌ ته‌نیا لێكدانه‌وه‌یه‌كی ساده‌یه‌ بۆ یه‌كێك له‌ مه‌رجه‌ سه‌ره‌كیه‌كانی لێكۆڵینه‌وه‌كه‌ی Website Greader).

لێكۆڵینه‌وه‌ی Website Grader چه‌ند لایه‌نێكی گرینگ و هه‌مه‌ڕه‌نگ له‌ خۆ ده‌گرێت، وه‌ك، زانیاریه‌كانی نێو META TAG كه‌ هه‌موو په‌ڕه‌یه‌كی ماڵپه‌ڕه‌كه‌ی ده‌بێت هه‌یبێت بۆ ئه‌وه‌ی سه‌ركه‌توو و درووست بێت. له‌ هه‌مان لێكۆڵینه‌وه‌ و تاقیكردنه‌وه‌دا بوونی خزمه‌تگووزاری RSS تاقی ده‌كرێته‌وه‌ و به‌پێی ماڵپه‌ڕه‌كه‌ بوونی RSS یه‌كێكه‌ له‌ ئامرازه‌كان بۆ نزیكردنه‌وه‌ی ماڵپه‌ره‌كه‌ت له‌ سه‌ركه‌وتن.
له‌ هه‌مووی گرینگتر ئه‌وه‌یه‌ كه‌ Website Grader وێنه‌یه‌كی گشتییت بۆ درووست ده‌كات له‌وه‌ی كه‌ ئاستی ماڵپه‌ڕه‌كه‌ت چۆنه‌ و چۆن باشتری بكه‌یت، هه‌موو خاڵاكانت له‌ یه‌ك په‌ڕه‌دا به‌ كۆ پیشان ده‌دات، كۆكردنه‌وه‌ی ئه‌و خاڵانه‌ به‌ دوور له‌ Website Grader پرۆسه‌یه‌كی كاتبه‌ره‌ و له‌وانه‌یه‌ هه‌موویانت له‌ بیر نه‌بێت بۆ چاك كردن.

تێبینی: ئامانجی سه‌ره‌كی له‌ ئه‌نجامی تاقیكردنه‌وه‌ی Website Grader بۆ ئه‌وه‌یه‌ كه‌ دۆستایه‌تی نێوان ماڵپه‌ڕه‌كه‌ت و گه‌ڕۆكه‌كان چاكتر بكات. له‌ هه‌مان كاتدا چاكتر كردنی ماڵپه‌ڕه‌كه‌ت له‌و ڕووانگه‌یه‌وه‌ سوودی دیكه‌ی ده‌بێت و هه‌ندێك له‌ چاكتر كردنه‌كان ده‌بنه‌ هۆی كار ئاسان كردنه‌وه‌ بۆ میوانانی ماڵپه‌ڕه‌كه‌ت. بۆ نموونه‌ دابین كردنی خزمه‌تگووزاری RSS.

پێم وایه‌ ئه‌و پێناسه‌یه‌ مه‌به‌ست له‌ كار و تایبه‌تیی Website Grader ڕوون ده‌كاته‌وه‌ بۆ ناوه‌ڕۆكی بابه‌ت.

سه‌ردانی www.websitegrader.com بكه‌، له‌ خانه‌ی Website URL (یه‌كه‌م خانه‌) به‌سته‌ری ماڵپه‌ڕه‌كه‌ت بنووسه‌، بۆ نموونه‌ من www.webchin.org ـم نووسی. له‌ خواره‌وه‌ كرته‌ بكه‌ سه‌ر Generate Report. كه‌مێك چاوه‌ڕوان به‌ و دواتر ئه‌نجامی تاقیكردنه‌وه‌كه‌ له‌ خواره‌وه‌ ده‌رده‌كه‌وێت.

شیكردنه‌وه‌ی به‌شه‌كانی ئه‌نجامی تاقیكردنه‌وه‌.
وێنه‌ی ئه‌نجامی تاقیكردنه‌وه‌ی وێبچن ببینه‌ به‌ گه‌وره‌یی (تێبینی: قه‌باره‌ی وێنه‌ ٢٥٧ كیلۆبایته‌).
http://aso.naderi.googlepages.com/webch … er-big.gif

له‌ سه‌ره‌وه‌ی به‌شی ئه‌نجام پله‌ی ماڵپه‌ڕ ده‌بینی كه‌ له‌ نێوان ١ تا ١٠٠ پله‌ ده‌بێت،



وه‌ك ده‌بینی وێبچن پله‌ی ٩٥ ی به‌ ده‌ست هێناوه‌ له‌ ١٠٠، ئایا له‌ سه‌ر چ بنه‌مایه‌ك ئه‌و پله‌یه‌ دیاری ده‌كرێت؟
Website Grader ئاماژه‌ی به‌وه‌ داوه‌ كه‌ زۆرتر له‌ ٥٠ مه‌رج له‌سه‌ر ئه‌و ماڵپه‌ڕه‌ تاقی ده‌كرێته‌وه‌، سه‌ره‌كی ترینیان ماڵپه‌ڕه‌كه‌ چۆن داڕێژراوه‌، شوێنی ماڵپه‌ڕ له‌ گه‌ڕۆكه‌كاندا، به‌كاربردنی ترافیك (Alexa) وه‌ك سه‌رچاوه‌ی یه‌كه‌م، توانا و هێزی ماڵپه‌ڕ له‌ كاركردندا (په‌یوه‌ندیدار به‌ ڕاژه‌كاری ماڵپه‌ڕ و وه‌ڵامدانه‌وه‌ی بۆ كرته‌ و داواكاریه‌كان). هه‌روه‌ها مه‌رجی دیكه‌ كه‌ Website Grader ده‌ستنیشانی نه‌كردوون.

On Page SEO،



له‌م به‌شه‌ی تاقیكردنه‌وه‌دا لایه‌نه‌ په‌یوه‌ندیداره‌كان به‌ SEO و به‌ شێوه‌یه‌كی ناڕاسته‌وخۆ Usability تاقی ده‌كرێته‌وه‌ و ئه‌نجامه‌كانی ده‌رده‌كه‌ون.
مه‌به‌ستم له‌ لایه‌نی په‌یوه‌ندیدار به‌ Search Engine Optimization ئه‌و فاكته‌رانه‌ن كه‌ گرینگن و هاوكاری ماڵپه‌ڕه‌كه‌ت ده‌كه‌ن بۆ ئه‌وه‌ی باشتر له‌ گه‌ڕۆكه‌كاندا ده‌ربكه‌وێت، له‌و فاكته‌رانه‌ و گرینگترینیان Title / سه‌ردێڕی په‌ڕه‌یه‌. له‌ ڕووانگه‌ی Search Engine Optimization ـه‌وه‌ ده‌بێ هه‌موو په‌ڕه‌یه‌كی نێو ماڵپه‌ڕه‌كه‌ت سه‌ردێڕی تایبه‌ت به‌ خۆی هه‌بێت واته‌ Unique Title. گه‌ر ئه‌وه‌ جێبه‌جێ نه‌بوو، ده‌بێ له‌نیكه‌م سه‌ردێڕی په‌ڕه‌ به‌ شێوه‌یه‌كی ڕاسته‌وخۆ په‌یوه‌ندی هه‌بێت له‌گه‌ڵ ناوه‌ڕۆكی په‌ڕه‌.
بۆ نموونه‌ گه‌ر په‌ڕه‌یه‌كت هه‌بوو كه‌ بابه‌تێكی كۆمپیوته‌ری له‌ خۆ گرتبوو، نابێت سه‌ردێڕه‌كه‌ی نووسرابێت "بابه‌تی سیاسی" به‌ڵكوو ده‌بێت نووسرابێت "بابه‌تی كۆمپیوته‌ری" یان پێكان به‌ شێوه‌یه‌كی وردتر و نزیكتر.

له‌ هه‌مان به‌شدا تایبه‌تمه‌ندی Alt Text تاقی ده‌كرێته‌وه‌، له‌ پێشدا گرینگه‌ وه‌ك خاوه‌ن ماڵپه‌ڕ بزانی Alt Text چیه‌ و بۆ ده‌بێ به‌كار ببرێت؟!
Alt Text ئه‌و نووسینه‌یه‌ كه‌ بۆ وێنه‌یه‌ك ده‌ینووسی، ده‌كریت پێناسه‌ یان ناوی وێنه‌كه‌ له‌ خۆ بگرێت، كاتێك وێنه‌كه‌ نه‌بیرا یان ده‌رنه‌كه‌وت ئه‌و نووسینه‌ی له‌ شوێن ده‌رده‌كه‌وێت، بۆ نموونه‌ گه‌ر سه‌ردانی www.webchin.org بكه‌یت ده‌بینی وێنه‌كان به‌ بێ كێشه‌ ده‌رده‌كه‌ون و كاتێك Pointer ی مشكی كۆمپیوته‌ره‌كه‌ت ببه‌یته‌ سه‌ری ده‌بینی پێناسه‌/ ناوی وێنه‌كان ده‌رده‌كه‌ون،



له‌وانه‌یه‌ بپرسیت كه‌ كاتێك وێنه‌كه‌ ده‌بینم، بوونی ئه‌و نووسینه‌ سوودی چیه‌؟
ده‌بێ وه‌ك خاوه‌ن ماڵپه‌ڕ ئه‌وه‌ بزانیت كه‌ هه‌موو كه‌س Internet Explorer یان FireFox ی نیه‌، هه‌موو كه‌س ناتوانێ ئه‌و وێبگه‌ڕانه‌ به‌كار ببات، بۆ نموونه‌ كه‌سێكی نابینا كه‌ به‌ ئامێرێكی Screen Reader سه‌ردانی ماڵپه‌ڕه‌كه‌ت بكات هیچ نابینێت، به‌ڵكوو ئه‌و ئامێره‌ ناوه‌ڕۆكی ماڵپه‌ڕه‌كه‌ت ده‌خوێنێته‌وه‌ و له‌ ڕێی بیستنه‌وه‌ گوێی لێده‌بێت، له‌و كاته‌دا گرینگه‌ نووسینێك هه‌بێت كه‌ ئامێره‌كه‌ بتوانێ بیخوێنێته‌وه‌ بۆ به‌كارهێنه‌ری نابینا. هه‌روه‌ها له‌و وڵاتانه‌ی كه‌ ئینته‌رنێت زۆر خاوه‌، زۆرینه‌ی به‌كارهێنه‌ران پیشاندانی وێنه‌ ڕاده‌گرن، واته‌ نایانه‌وێ وێنه‌كانی نێو ماڵپه‌ڕ ببین، به‌ڵكوو زۆرتر تامه‌زرۆی خوێندنه‌وه‌ی ناوه‌ڕۆكن. نووسینی پێناسه‌ی وێنه‌كانی نێو ماڵپه‌ڕه‌كه‌ت له‌ ڕووانگه‌ی Usability ـه‌وه‌ سوود به‌و كه‌سانه‌ ده‌گه‌یه‌نێت كه‌ ناتوانن بیبینن / نایانه‌وێ وێنه‌كان ببینن.
به‌م شێوه‌ وێنه‌كان ده‌رده‌كه‌ون كه‌ كاتێك بۆ به‌كارهێنه‌ر بینراو نیه‌،



لێره‌دا گرینگی ئه‌و خاڵه‌ هه‌ست پێده‌كه‌یت كه‌ Website Grader له‌ تاقیكردنه‌وه‌دا هه‌یه‌تی.

كۆتایی به‌شی یه‌كه‌م، تا به‌شی دووه‌م سه‌ركه‌وتووبیت.