سڵاو هاوڕێیان،

وه‌ك ئاگادارن حه‌فته‌ی ڕابردوو كۆبوونه‌وه‌یه‌كمان هه‌بوو له‌ InSpeak كه‌ چه‌ند هاوڕێی چالاك و ئه‌ندامی وێبچن تێیدا به‌شدار بوون.

له‌ كۆبوونه‌وه‌كه‌دا باس له‌م خاڵانه‌ كرا،
١، سه‌رله‌نوێ نووسینه‌وه‌ی یاساكانی مه‌كۆكانی وێبچن و هه‌روه‌ها نووسینی یاسا بۆ مه‌كۆكان به‌ شێوه‌یه‌كی سه‌ربه‌خۆ، واته‌ گه‌ر مه‌كۆیه‌ك پێویستی كرد یاسای خۆی هه‌بێت جگه‌ له‌ یاسای گشتیی.
٢، دابه‌شكردنی مه‌كۆكان به‌ سه‌ر چه‌ند چاودێرێكدا، به‌ شێوه‌یه‌ك كه‌ هه‌ر چاودێرێك یان زۆرتر مه‌كۆیه‌ك بگرێته ئه‌ستۆی خۆی و چالاك ڕاگرتنی ئه‌و مه‌كۆیه‌ یه‌كه‌م ئه‌ركی سه‌رشانی بێت له‌ وێبچن.
٣، زیندوو كردنه‌وه‌ی گرووپی وه‌رگێڕانی وێبچن بۆ ئه‌وه‌ی بتوانێت به‌ شێوه‌یه‌كی چالاكانه‌تر به‌شدار بێت له‌ پرۆژه‌ جیاوازه‌كاندا و كاری ئه‌و گرووپه‌ ته‌نیا له‌ چوارچێوه‌ی به‌ كوردی كردنی سكریپت دا سنووردار نه‌بێت.
٤، بنبڕ كردنی دیارده‌ی تاكه‌كه‌سی بوونی وێبچن و نه‌مانی كه‌سێك به‌ناوی به‌ڕێوه‌به‌ر و هه‌موو ئه‌و كه‌سانه‌ی كه‌ وێبچن به‌ڕێوه‌ده‌به‌ن (چاودێر، ئه‌ندامی گرووپی وه‌رگێڕان و هتد...) ده‌بنه‌ ئه‌ندامی به‌ڕێوه‌به‌ریی و له‌ ژێر ناوی ئه‌ندامان له‌و جۆره‌ نووسینێكی گشتیی ده‌نووسرێت/

ڕوونكردنه‌وه‌ی خاڵه‌كان،
١، سه‌باره‌ت به‌ یاساكانی مه‌كۆكانی وێبچن، له‌و ماوه‌یه‌ی كه‌ ئه‌و یاسانه‌ نووسراون و هه‌بوون، به‌ شێوه‌یه‌كی زۆر باش په‌یڕه‌ویان لێ كراوه‌ و خاڵه‌كانی گوونجاو بوون بۆ به‌كارهێنانیان له‌ وێبچن، له‌ هه‌مان كاتدا زۆر تێبینی له‌سه‌ر هه‌ندێك له‌ خاڵه‌كانی یاساكان درووست بوون وپێداچوونه‌وه‌ی پێویست ده‌بێت.
به‌ كورتی یاساكانی مه‌كۆكانی وێبچن، توندتر (زۆر له‌ یاساكانی ئێستا توندتر)، پوختر و پێكه‌رتر ده‌بن.

هه‌ر ئه‌ندامێك كه‌ ٣ جار یاسا شكێنی بكات بۆ ماوه‌ی ٢٤ كاتژمێر له‌ مه‌كۆكان بێ به‌ش ده‌كرێت و ناتوانی سه‌ردانی مه‌كۆكانی وێبچن بكات تا ئه‌و كاته‌ تێنه‌په‌ڕێ.

٢، سه‌باره‌ت به‌ دابه‌شكردنی كاره‌كان به‌ سه‌ر چه‌ندین چاودێردا، مه‌كۆكانی وێبچن ئێستا چه‌ند چاودێرێكی هه‌یه‌ كه‌ بریتین له‌و هاوڕێ و دۆستانه‌ی خۆمان كه‌ هه‌موو كات هه‌وڵی سوود گه‌یاندن ده‌ده‌ن و هیوای یه‌كه‌میان پێشخستنی بواری ئا‌ی‌تی كوردییه‌ له‌سه‌ر نێت.
به‌داخه‌وه‌ هه‌ندێك له‌و هاوڕێیانه‌ به‌هۆی سه‌رقاڵ بوونیان به‌ژیانی ڕۆژانه‌یانه‌وه‌ و كه‌م كاتییان، نه‌یاتوانیوه‌/ ناتوانن وه‌ك چاودێر له‌ وێبچن به‌رده‌وام بن، هه‌روه‌ها چاودێرانی ئێستا كاره‌كانیان له‌ چوارچێوه‌ی مه‌كۆیه‌كی تایبه‌ت به‌ خۆیان سنووردار نه‌كراوه‌ و ئه‌ركی چاودێریكردنی هه‌موو مه‌كۆكانیان له‌سه‌ر شانه‌.

بۆ كه‌مكردنه‌وه‌ی ئه‌ركی سه‌رشانی چاودێران و دابه‌شكردنی كاره‌كان به‌ شێوه‌یه‌ك كه‌ هه‌ر چاودێرێك كارێكی تایبه‌تی هه‌بێت و مه‌كۆیه‌كی تایبه‌ت چاودێری بكات، سیسته‌می چاودێری كردنی وێبچن ده‌گۆڕدرێت بۆ شێوازێك كه‌ هه‌ر چاودێرێك مه‌كۆیه‌ك چاودێری بكات كه‌ بۆ خۆی حه‌زی لێی بێت و دڵنیابێت كه‌ ده‌توانێ چالاكیی ئه‌و مه‌كۆیه‌ ڕابگرێت.

سوودی سه‌ره‌كی ئه‌و كرداره‌ ئه‌وه‌ ده‌بێت كه‌ هه‌ر چاودێرێك مه‌كۆیه‌كی تایبه‌ت به‌ خۆی هه‌ڵده‌بژێرێت و هه‌موو كاره‌كانی نێو ئه‌و مه‌كۆ وه‌ك، نووسینی بابه‌تی و نوێ و سه‌رنج ڕاكێش، نووسینی وه‌ڵام بۆ پرسیاری ئه‌ندامان، سه‌پاندنی یاساكان له‌و مه‌كۆدا، هه‌روه‌ها ئارام ڕاگرتنی ئه‌و مه‌كۆیه‌ی له‌سه‌ر شان ده‌بێت و پێویست ناكات خه‌مخۆری مه‌كۆكانی دیكه‌ بێت.

ئه‌و كه‌سه‌ی كه‌ بۆ چاودێری مه‌كۆیه‌ك هه‌ڵده‌بژێردرێت، ده‌بێت ڕابردوویه‌كی سوودبه‌خشی هه‌بووبێت له‌ وێبچن، چالاك بووبێت و هه‌روه‌ها چالاك ڕاگرتنی مه‌كۆكانی وێبچن و سوود گه‌یاندن به‌ هاوزمانانی یه‌كه‌م ئاواتی بێت. جێبه‌جێ نه‌كردنی كاره‌كانی خۆی وه‌ك چاودێر لێپرسینه‌وه‌ی له‌سه‌ر ده‌كرێت و هه‌نگاوی پێویستی بۆ هه‌ڵده‌گیردرێت.

٣، سه‌باره‌ت به‌ گرووپی وه‌رگێڕان، وه‌ك ئاگادارن له‌ وێبچن دا چه‌ندین سكریپت كراوه‌ته‌ كوردی به‌ هاوكاریی ئه‌ندامان و هاوڕێیان له‌ وێبچن. بۆ كۆكردنه‌وه‌ی هه‌وڵ ئه‌و ئه‌ندام و هاوڕێیانه‌، به‌ پێویستی ده‌زانین گرووپی وه‌رگێڕانی وێبچن زیندوو بكرێته‌وه‌ و هه‌وڵ به‌كوردی كردنی پرۆژه‌ی گه‌وره‌تر له‌ سكریپت بدات.
هه‌موو كه‌سێك كه‌ ئه‌م توانایانه‌ له‌ خۆیدا ببینێته‌وه‌، ده‌توانێت ببێته‌ ئه‌ندامی ئه‌و گرووپه‌،
٭ توانای خوێندنه‌وه‌ی زمانی ئینگلیزی به‌بێ كێشه‌و تێگه‌یشتن له‌ مانای ڕسته‌و و وشه‌كان.
٭ توانای نووسین و خوێندنه‌وه‌ به‌ زمانی كوردی سۆرانی به‌بێ هیچ كه‌م و كۆڕییه‌ك.
٭ ڕازیبوون به‌وه‌ی هه‌موو كاره‌كان له‌ژێر ناوی گرووپی وه‌رگێڕانی وێبچن جێبه‌جێ ده‌كرێن و بڵاو ده‌كرێنه‌وه‌ و مافه‌كانی بۆ وێبچن پارێزراو ده‌بێت.

هه‌روه‌ها گرینگترین مه‌رج ئه‌وه‌یه‌ كه‌ فه‌رهه‌نگی ئای‌تی زانستپه‌روه‌رانی كورد په‌سه‌ند بكات و ئه‌و فه‌رهه‌نگه‌ وه‌ك یه‌كه‌مین سه‌رچاوه‌ی وشه‌ی كوردی به‌كار ببات.

٤، سه‌باره‌ت به‌ بنبڕ كردنی دیارده‌ی تاكه‌كه‌سی به‌سه‌ر وێبچن دا، من وه‌كوو به‌ڕێوه‌به‌ر و هاوڕێیانی دیكه‌ وه‌ك چاودێر هه‌موو كات له‌ هه‌وڵی ئه‌وه‌دا بووین كه‌ وێبچن به‌ هیچ شێوه‌یه‌ك دیارده‌ی ماڵپه‌ڕی تاكه‌كه‌سی به‌ خۆیه‌وه‌ نه‌بینێت، بۆ باشتر سه‌پاندنی ئه‌و بیرۆكه‌یه‌، من چیتر وه‌ك به‌ڕێوه‌به‌ر نابم و به‌ڵكوو ده‌چمه‌ ڕیزی هاوڕییانی دیكه‌وه‌ وه‌ك چاودێرێك و كه‌سێك كه‌ ده‌مه‌وێ ئه‌و كاته‌ی كه‌ هه‌مه‌ ته‌رخانی بكه‌م بۆ پێشختنی ئه‌و مه‌كۆیه‌ی كه‌ ده‌مه‌وێ چالاك بم تێیدا.
له‌ چه‌ند ڕۆژ و حه‌فته‌ی داهاتوودا ئه‌م هه‌نگاوه‌ جێبه‌جێ ده‌كرێت و له‌ ژێر ناوی هه‌موو ئه‌و كه‌سانه‌ی كه‌ وێبچن به‌ڕێوه‌ده‌به‌ن (كه‌ بریتی ده‌بن له‌و كه‌سانه‌ی كه‌ چاودێری ده‌كه‌ن) ده‌نووسرێت چاودێر و هه‌موومان یه‌ك ئاستمان ده‌بێت و ئامانجی هاوبه‌شمان سوود گه‌یاندن به‌ یه‌كتری ده‌بێت و به‌تیابه‌ت ئه‌ندامانی وێبچن.


دوور له‌ كۆبوونه‌وه‌كه‌، زۆر پێشنیار و تێبینی نووسراوه‌ سه‌باره‌ت به‌و كه‌م كۆڕییانه‌ی كه‌ له‌ وێبچن دا هه‌ن و به‌ شێوه‌یه‌كی گشتیی هه‌موویان په‌سه‌ند كراون و له‌ زووترین كاتی داهاتوودا جێبه‌جێ ده‌كرێن.

سووپاس بۆ هه‌موو لایه‌ك.