زانیاری نامەی پرۆگرامۆکەی PunBB بۆ پێکهێنانی مەکۆیەکی خێرا و خاوێن

ناوەڕۆک

پێناسەیەکی PunBB

PunBB بریتییە لە پرۆگرامۆکەیەک Script بۆ پێکهێنانی مەکۆی سەر وێب. بە زمانی PHP نووسراوە و بە پشت بەستن بە MySQL زانیارییەکانی پاشەکەوت دەکرێن. بە واتایەکی دیکە بۆ ئەوەی بتوانرێت PunBB لەسەر ڕاژەکارێک دابمەزرێت، دەبێت ئەو ڕاژەکارە پاڵپشتی PHP و MySQL بکات.

پرۆگرامۆکەی PunBB بە خێرایی و کەم قەبارەیی ناسراوە، لە ڕاستیدا یەکێکە لە ئاسانترین و خاوێن ترین پرۆگرامۆکەکانی پێکهێنانی مەکۆ کە ئەمڕۆ لەسەر وێب هەن. دامەزراندنی PunBB پێکهاتووە لە پڕکردنەوەی چەند خانەیەکی کەم و دەست بەکاربوون لەگەڵ بەکاربردنی پاش چەند خوولەکێکی کەم. گرینگی دانمان بە PunBB دەگەڕێتەوە بۆ ئەو بنەمایە کە پرۆگرامۆکەی خاوێن، خێرا و کەم کێشە گرینگترە و درووست ترە بۆ ناسین بە پێچەوانەی پرۆگرامۆکەی دیکە کە تایبەتمەندی ناپێویست و هەروەها کێشەی زۆرتریان هەیە.

داگرتن و دامەزراندن

PunBB لە لایەن کۆمەڵێک کارمەندی بە توانا و زانا لە بواری خۆیان پەرە پێدەدرێت، بەستەری سەرەکی پرۆژەی PunBB هەموو کات www.punbb.org بووە و تا ئێستاش هەروایە. گرینگە کە هەموو کات پرۆگرامۆکەی PunBB لە سەرچاوەی یەکەم و ماڵپەڕی فەرمییەوە دابگیردرێت. لە مێژووی PunBB دا سێ گەورە وەشان بڵاو کراوەتەوە، وەشانی ١،٢ و دواتر ١،٣ و نوێترین وەشانی ئێستا ١،٤ ـە، هەر یەک لە وەشانەکان کۆمەڵێک ژێر وەشانیان هەیە بۆ نموونە نوێترین ژێر وەشان تا کاتی نووسینی ئەم بەڵگەنامەیە ١،٤،٢ ـە. لە ئەم بەڵگەنامەدا زانیارییەکانمان لەسەر وەشانەکانی ١،٣ و ١،٤ دەبن.

بۆ داگرتنی وەشانی ١،٣،٦ کرتە لە http://punbb.informer.com/downloads.php#1.3.6 بکە.
بۆ داگرتنی وەشانی ١،٤،٢ کرتە لە http://punbb.informer.com/downloads.php#1.4.2 بکە.

پاش داگرتنی وەشانێک، پەڕگەکانی نێو .zip دەربهێنە Extract بکە. هەموو بوخچەی و پەڕگەکانی بە ئەم شێوازە دەبن (لەسەر وەشانی ١،٤،٢ ئەم بابەتە درێژە دەدرێت).

admin
cache
extensions
img
include
lang
style
.htaccess.dist
ChangeLog
COPYING
delete.php
edit.php
extern.php
favicon.ico
footer.php
header.php
help.php
humans.txt
index.php
login.php
misc.php
moderate.php
post.php
profile.php
README
README.md
register.php
rewrite.php
robots.txt
search.php
userlist.php
viewforum.php
viewtopic.php

بوخچە و پەڕگەکانی سەرەوە دەبێت وەک خۆیان بار بکرێنە نێو شوێنی تایبەت بە ماڵپەڕ بۆ ئامادەکردنی دامەزراندن. لە هەنگاوی داهاتوودا پێویست بە نووسینی زانیارییەکانی بنکەی دراوە دەبێت، بۆ  ئەو مەبەستە پێویست دەکات بنکەیەکی دراوەی MySQL لەگەڵ بەکارهێنەرێک بە دەسەڵاتی درووست هەبێت.

پاش بارکردنی پەرگەکانی سەرەوە بۆ نێو شوێنی ماڵپەڕ، لە وێبگەڕدا ناونیشانی ماڵپەڕەکەت بنووسە. ئەگەر هەنگاوەکانی سەرەوە بە درووستی جێبەجێ کرابن، دەبێت پەڕەیەکی وەک وێنەی ژمارە ١ بکرێتەوە.

دامەزراندنی PunBB وێنەی هەنگاوی یەکەم

وێنەی ژمارە ١ - دامەزراندنی PunBB

کرتە لە بەستەری install.php بکە، دواتر پەڕەیەکی نوێ دەکرێتەوە بۆ نووسینی زانیارییەکانی بنکەی دراوە. هەموو زانیارییەکان بە درووستی بنووسە، کرتە لە Start Install بکە، پاش چەند چرکەیەکی کورت مەکۆی PunBB دادەمەزرێت و ئامادە دەبێت بۆ بەکاربردن. پاش دامەزراندن بە سەرکەوتوویی، یەکەم پەڕەی مەکۆکان وەک وێنەی خوارەوە دەبێت. (وێنەی ژمارە ٢)

دامەزراندنی PunBB هەنگاوی کۆتایی دامەزراندن / وێنەی دووەم

وێنەی ژمارە ٢ - دامەزراندنی PunBB

زمانی کوردی

PunBB لە وەشانەکانی سەرەتاوە واتە وەشانی ١،٢ بۆ نوێترین وەشان هەموو کات بە زمانی کوردی سۆرانی هەبووە بە هاوکاری گرووپی وەرگێڕانی وێبچن و کۆمەڵێک هاوڕێی دڵسۆز. کرتە لە ئێرە (بەستەری داگرتنی زمانی کوردی بۆ PunBB وەشانی ١،٤،٢) بکە و پەڕگەی .zip دابگرە.

پاش داگرتن و Extract کردنی بوخچەی تایبەت بە زمانی کوردی، بوخچەی Kurdish بار بکە نێو بوخچەی lang. بۆ چالاک کردنی زمانی کوردی کرتە بکە سەر Administration و دواتر Setting،  نرخی هەڵبژاردنی Default Language بگۆڕە بۆ Kurdish. بە ئەو شێوەیە هەموو ئەندامێک کە پاش ئەو گۆڕانکارییە خۆی تۆمار بکات زمانی کوردی زمانی سەرەکی دەبێت لە کاتی بینینی مەکۆکان. بۆ ئەوەی زمانی کوردی بۆ هەژماری خۆت (هەژماری بەڕێوەبەر) جالاک بکرێت، کرتە بکە سەر Profile و دواتر Setting، نرخی زمان بگۆڕە بۆ Kurdish بۆ دەرکەوتنی کوردی سۆرانی وەک زمانی سەرەکی مەکۆکان بۆ هەژماری خۆتان وەک بەڕێوەبەر.

ستایڵی کوردی

PunBB بە تایبەت وەشانی ١،٣ بۆ سەرەوە هیچ کێشە یان کەم و کۆڕییەکی نییە لە درووست پیشاندانی دەقی نووسراو بە ئەلف و بێی کوردی سۆرانی. بەڵام بۆ درووست ڕاست بۆ چەپ دەرکەوتنی دەقەکان، پێویست دەکات دەستکاری پەڕگەی تایبەت بە CSS بکرێت بە مەبەستی جێبەجێ کردنی ئەو کارە.  کرتە لە ئێرە بکە بۆ داگرتنی ستایڵی دەستکاریکراو کە دەتوانرێت بەکار ببریت بۆ درووست دەرخستنی دەقی نووسراو بە زمانی کوردی سۆرانی. (پەڕگەی ناوبراو هەمان پەڕگەی بنەڕەتی PunBB ـە تەنیا دەستکاری ئاستی دەرکەوتنی دەقەکان کراون).

بەڕێوەبردن لە PunBB

وەک بەڕێوەبەر لە PunBB هەموو جۆرە ئامرازێک بەسوود هەیە کە بەڕێوەبردن و دانانی دەسەڵاتی درووست بۆ مەکۆ و ئەندامان زۆر بە ئاسانی جێبەجێ دەکرێت. لە لیستەی بەستەرەکانی سەرەوە کرتە لە بەڕێوەبەرایەتی بکە و ڕێکخستنەکانی مەکۆکان بە پێی پێداویستی ماڵپەڕ و پرۆژەتان رێکبخەن.

پێوەکراو لە PunBB

لە وەشانی ١،٣ و نوێتر لە PunBB دا پێوەکراو Extenstion هەیە، مەبەست لە دامەزراندنی پێوەکراو ئەوەیە کە تواناکانی PunBB زۆرتر بکات و تایبەتمەندی نوێ بۆ پرۆگرامۆکە زۆر بکات، بۆ نموونە ناردنی پەیامی تایبەت لە نێوان ئەندامان دا ڕاستەوخۆ لەگەڵ PunBB دانامەزرێت، بەڵام وەک پێوەکراو هەیە و دەتوانرێت ڕاستەوخۆ لە بەشی بەڕێوەبەرایەتی PunBB دابمەزرێندرێت.

گرووپی پەرەپێدەری PunBB بۆ خۆیان هەندێک پێوەکراوی فەرمیان بڵاو کردووەتەوە کە بەکارهێنەرانی PunBB دەتوانن بەکاریان ببەن، لە http://punbb.informer.com/extensions هەن. هەموو پێوەکراوێک پاش داگرتن بار دەکرێتە نێو بوخچەی extensions و دواتر لە بەشی بەڕێوەبەرایەتی مەکۆکان چالاک دەکرێت. (به‌ڕێوه‌به‌رایه‌تی » پێوه‌كراوه‌كان » رێکخستنی پێوه‌كراوه‌كان).

تایبەتمەندی گەڕان

لە PunBB وەک لە هەموو پرۆگرامۆکەکانی دیکەی هاوشێوە بەشی گەڕان پێویستی بە نوێکردنەوەی بەردەوام هەیە بۆ تۆماربوونی هەموو بابەت و پەیامەکان لە خانە و خشتەکانی بنکەی گەڕان تۆمار بکرێن و دواتر ئەندامان بتوانن نوێترن بابەت و پەیامەکان بە ئاسانی بدۆزنەوە.

نوێکردنەوەی بنکەی گەڕان کاتی زۆری پێویست دەبێت و درووست وایە لە کاتی جێبەجێ کردن دا بیر لە ئەوە بکرێتەوە مەکۆکان داخراو بن بۆ کەمکردنەوەی فشار لەسەر ڕاژەکاری ماڵپەڕ. گەڕان و ڕێکخستنەکانی لە به‌ڕێوه‌به‌رایه‌تی » بەڕێوەبردن » درووستكردنه‌وه‌ی بنكه‌ی زانیاریی گه‌ڕان هەیە.

زانیاری و بەستەری دیکە

لە وێبچن ٣ مەکۆی جیاواز هەن بۆ هەر سێ گەورە وەشانی PunBB، چەندین ساڵە پرسیار و وەڵام دەنووسرێت و تا ئێستا بەشێکی زۆر لە کێشە و گۆڕانکارییەکانی PunBB تاوتوێ کراون، لە کاتی پێویست بوون بە یارمەتی بۆ چارەسەر کردنی کێشەیەک یان پەرەپێدانی مەکۆکانت، سەردانی مەکۆکانی وێبچن بکە و لە بەشی درووست هاوکاری وەربگرە.

بۆ دڵنیا بوون لە هەموو نوێکارییەکانی PunBB، لە هەنگاوی یەکەم دا سەردانی بەستەری بنەڕەتیی ماڵپەڕی فەرمی بکە، هەموو هەواڵ و گۆڕانکارییەکانی پەیوەندیدار بە PunBB لە ماڵپەڕی بنەڕەتییەوە سەرچاوە دەگرن، هەروەها لە وێبچن لەگەڵ هەبوونی ئاگاداری و گۆڕانکاری گرینگ، هەواڵ دەنووسین.

ئەم زانیاری نامەیە لەسەر وەشانی ١،٤ نووسراوە، ئەگەر وەشانی ئێوە لەگەڵ هەنگاوەکانی ئەم بابەتە یەک ناگرێتەوە، تکایە سەردانی مەکۆکانی وێبچن بکەن بۆ زانیاری زۆرتر و وەرگرتنی هاوکاری درووست بە وەشانەکەتان
بەستەری بەسوود